انا ديما كنت كاندخل لهاد لموقع و لكلن عمرني ماتخيلت نطرح لمشكل ديالي، لمهم بلا منطول، انا بنت عندي 23 عام، الحمد لله عايشن مزيان، عمري و لا خصاتني شي حاجة، قريت ف احسن المدارس الحمد لله و لكن هادش موراه بزاف مخبي، المشكل هو انه الوالد ديالي دكتاتوري بزاف، ماكايفراقش بين التعامل فالخدمة و الدار، عمرو ماكان قريب مني، صراحة عمري ما حتارمتو كانخاف منو و صافي، فينما كنت كانشوف شي بنت مفاهمة معا باباها كاتجيني الغيرة. المهم قريت و تخرجت،ملي كنت ف الباك كان الحلم ديالي هو نكمل قرايتي علا برا، كنحلم ليل و نهار نمشي لفرنسا ندير ماستر و نخدم و نبين انني قادرة ندير شي حاجة براسي.خاصة انه كلشي كايقول ليا كون ماشي لواليد ديالك ماكونتي ديري والو. لمشكل انه واقف ليا فطريقي؟ ماخلانيش. جاوني بزاف ديال فرص الشغل فمدن اخرى ماكايبغيش ,كايقول ليا ماعندك فين تمشي جلسي هنا ندير ليك مشروع ديالك،كايقول ليا انا قريتك بفلوسي انا لي نقول ليك شنو ديري انا بغيت ندير حياتي بيدي. مؤخرا ملي مابغيتش ندير ليه خاطرو قاطع عليا لهدرا بحال يلا ماكايعرفنيش، يلا كنت ف شي بيت كايخويها، و قاطع عليا حتا لمصروف و كايقول ليا ماليك عندي والو، هادشي كامل حيت بغيت نكمل قرايا، و هو كاحساب ليه واش بغيت غير نخوي دار و مانبقاش معاهوم,الحمد لله انه الواليدة معاوناني معنويا حيتاش تا هيا مسكينة صابرة و كاتقول ليا مصاب توصلي ديري هادش لي بغيتي. عافاكوم عاونوني اش ندير راه هادي 4 شهور و انا صابرانا من النوع الي لي فراسي هو لي كانديرو ولكن خفت لهادشي يخرج عليا و بديت كانعيا واش ندير ليه خاطرو ولا نزيد نصبر علا داكشي لي بغيت نحقق ف حياتي.
0 التعليقات
