بغيت شي حل اللي يريحني و يريح خوتي.
السلام عليكم و شكرا مسبقا لأي واحد يحاول يساعدني واخا برأي.
احنا عائلة تتكون من ثلاث بنات مزوجات و 2 ديال الاولاد في السن ديال الزواج ولكن مازال ما ساهل الله على الأولاد في الزواج، الواليد كبر في السن و شد الفراش بسبب شلل نصفي، الوالدة متوفية.
المشكل بدا مللي الوالدة توفات في 2008، كلشي تبدل، خوتي ب2 مرضو بأمراض نفسية، اللي بالغ من العمر 26 سنة عندو انفصام الشخصية، تبعنا ليه عند الطبيب، درنا الرقية الشرعية، القرآن ، بدون نتيجة و الثاني في عمره 40 سنة عندُ الوسواس، مكيبغيش يتعالج، كيجيب لو راسو باللي غادي نصبو ليه شي فخ، فكيرفض العلاج، مؤخرا مشيت كسيتو ما خليتو ناقص من والو، كنت جيت في عطلة لدارنا، قلتلو لبس نقي باش نخرجو، خلا على الحوايج اللي شريتلو و لبس حوايج مدربلين، خليتو على خاطرو مقلت والو، ولكن اللي ضرني في خاطري هو من بعد، عرفت باللي رماهم في طارو ديال الزبل حشاكم.
الأب ديالي مسكين اللي غادييراعيهم طاح بشلل نصفي ألزمه الفراش بعدما كان هاز المسؤولية،و بحكم آني كنسكن بعيدة عليهم، فمعنديش كفاش نقابلهم، كنعاون ماديا باش يتعالجو، و لكن الله غالب.. يعني صعيبة المتابعة ديالهم، أحيانا ملي كنبغي نطمأن عليهم عبر الهاتف، كتقولي الأخت ديالي باللي كيهدروا غي بوحدهم في الزنقة، كيسيحوا في الليل، مكيبغيوش يبدلو حوايجهم،أو لا كيمدو إيديهم اللي كيسوا و اللي مكيسواش، كيطير النعاس من عيني، كنمرض في صحتي، المشكل مع البعد و الظروف ممساعدنيش باش نكون حاضرة،مع ولادي باقين صغار، خاص اللي يقابلهم، أو راجلي زايد علي كيعايرني بخوتي مراض،ما باغينيش نتعاون معاهم، تخلقوا مشاكل بيني و بينو بسبابهم، خيرني بينو و بين خوتي فآختاريت بطبيعة الحال نكون بجنب خوتي، خاصة و أن الأم اللي غادي تحن فيهم راها متوفية.. خلاصة القول، راني في العذاب ملي كنتفكر 2 خوت مراض ليا بعدماكانوا بخدمتهم و كرامتهم في رمشة عين حالهم انقلب، و مكاينش اللي يسول فيهم، نفسيتي كنحس بيها محطمة، .
اليوم و من هاد الصفحة، كنتوجه ليكم إخواني أخواتي إلى شي واحد كيعرف شي جمعية أولا مستشفى الأمراض النفسية من غير 36، يكونوا الأطر ديالوا كفؤ يعطيني عنوانهم،و شكرا لكم.
أعتذر إلا طولت عليكم، في انتظار آرائكم دعيو بالشفاء العاجل إنشاء ألله لمرضانا و مرضى المسلمين.. آمين وجزاكم الله خيرا.
0 التعليقات
